I.
Vëgio zeneize, mi veddo voentëa
chi sotto a-e feste, sti dö-trei banchetti,
quest'invexendo, questo pö de fëa,
sto bordello che fan ommi e gardetti.
No capiscio, ö confesso, a grande idea
(cöse vêu dî no aveì çerti speggetti!)
de quelli che con gran prosopopëa,
co-a cresta rossa, van comme galletti
sbraggiando seriamente che bezêugna
finila con çerti ûsi do passôu;
ch'o l'é ûn scandalo, ûn sgrêuxo, ûnn-a verghêugna:
che no l'é i tempi de messê l'Abbôu,
che Zena a no l'é Pentema o Tribêugna,
che a çittae e l'é a çittae, e no ûn mercôu.
28