Pagina:Malinverni.Due.brocche.de.viovetta.1908.pdf/95

Da Wikivivàgna
Sotto voxe


O mottetin de sûccao, mæ pestûmmo,
fiocco de neive, giglio, giäsemin,
ti no veddi che brûxo e che consûmmo
a-o fêugo de quelli êuggi biricchin?

ti no veddi che tûtto me reciûmmo
quando, pe caxo, ti m'ê da vixin,
e che quande te parlo mi no fûmmo
pe rispetto do tò bello faccin?

Arba ciù assæ d'ûn drappo de bûgâ
a l'é a tò pelle, e a bocca ûnn-a mescciûa
de læte de corallo e de zuncâ:

a tò carne a l'é fresca, sann-a e dûa...
che paradiso poeite ammalloccâ
sensa camixa, in letto, bella nûa!….