 |
Questa pagina a no l'è stæta corretta. | |
L'é vëo pochi; – ma pochi çernûi,
tûtta gente che sa o fæto sò;
se sentivan con Mosto segûi:
comandante ciù fëo mi no so:
êuggi fin, barba neigra, ûnn-a faccia
da servî da modello a ûn scûltô:
pin de chêu, sensa puïa, sensa maccia…..
degno o san d'ëse o primmo fra lö.
Garibaldi o-i ciammava: – i mæ bravi
boîn zeneixi: – tra lö gh'ëa ûn pittin
di fighæti a ûzo Canzio, a ûso Savi,
e Bûrlando e Belleno e Dapin
e Sartoio e Gallian, – e via via,
tûtti zoeni de sò obbligasion:
pöso e chêu: ma a campagna finia,
se i contemmo, oimemi! quante son?
Dixe: – véddei chì e là, derré a ûn costo
a ogni colpo ûn borbon peccettâ!
Vedde quella gran barba de Mosto....
chi l'ha visti no i pêu ciù scordâ.
Chi l'ha visti sätâ sciù d'asbrïo
comme tanti farchetti, e poi zù,
zù pë ligge e pei bricchi, – c'ûn crïo:
Garibaldi! – no-i scorda mai ciù.
