 |
Questa pagina a no l'è stæta corretta. | |
Ean quaranta, – ma vaivan pe çento:
e l'é ben sovvegnîsene anchêu:
ëan quaranta, – ma aveivan l'argento
vivo addosso, – e ûnn-a fede in to chêu.
Pochi e bûlli; – con l'anima pinn-a
de coraggio, de forsa, d'ardî:
sò sûperbia: – puntâ a carabinn-a
e sparâ – sensa colpo fallî.
In sciö prôu là, da-o Stanghe, e pei monti
s'ëan vegnûi preparando coscì:
Garibaldi o g'ha dito: – seì pronti? –
Generale – han criôu – semmo chì!
Zù pe-a stradda d'Arbâ, tûtta reûze,
tûtta ville e palassi e giardin
spanteghæ, quæxi ascözi, pe-e crêuze
comme nii, comme verdi göghin,
quella seja de Mazzo, i Quaranta
zù pe-a stradda d'Arbâ se ne van:
gh'é chi ciarla, chi fûmma, chi canta....
tûtti ammian….. cöse?….. dove?….. lontan!
