 |
Questa pagina a no l'è stæta corretta. | |
Semmo a Pasqua tûtta scioia,
bella comme ûnn-a spozâ:
ûnn'ajetta se respia
fresca, bonn-a, imbarsamâ:
i zoenotti e e figge van
pe-i sentê dandose man:
din don dan, din don dan.
Presto torta, çimma pinn-a,
agnelletto, êuve, leitûga:
che remescio in ta cuxinn-a!
pésta, impotta, fa, pacciûga:
metti töa, damme ûnn-a man....
e d'arente e da lontan:
din don dan, din don dan.
Ma vortemose inderrê:
comme cangia a bella scena!
gh'é de case pe-i sestê
(che verghêugna ancon pe Zena)
streite, basse, senza sô....
li, no gh'intra o bon ûmö:
ûnn-a strêuppa de figgiêu
chi domanda ûn pö de pan:
che miseja! cianze o chêu:
e doman?.... e poidoman?....
no ghe n'é drento a-o bancâ
ni da pésta e da pestâ.
