 |
Questa pagina a no l'è stæta corretta. | |
pum! – l'ho dito? – o l'é ûn battöso
ch'o v'ha allivellôu due balle.
O foestê pin de pellisse
o sta lì co-e lærfe imböse:
– bonn-e paole e peie nisse –
lê o creddeiva chi sa cöse;
o l'ha fæto sciù a valixe,
e o l'é camminôu spedîo….
– stare molto freddo – o dixe,
raozo, moælo, arrensenîo.
Povee scioî! quante lamenti,
sotto a-o zëo, fan tra de lô!
streppellæ da tûtti i venti
n'han ciù manco ûn pö d'odô:
Ah! m'avesse, – ûnn-a viovetta
diva, spiando, in sce-o terren, –
vëi piggiôu quella gardetta!....
bello, a-o cädo, moîghe in sen! –
In compenso, pe l'artista
gh'é ûnn-a ricca missa in scena:
vegnî all'äto: gh'é ûnn-a vista
ch'a l'incanta: bella Zena
tûtta gianca! gianche e stradde,
gianchi i teiti, i orti, i giardin,
e lazzù, lunxi, e valladde
gianche, e Fasce, e Portofin.
