Pagina:Malinverni.Due.brocche.de.viovetta.1908.pdf/33

Da Wikivivàgna

Che bordello!.... che fô!.... fêua o lûminäio!
sbraggiavan da-o pollâ: – quattro violin
davan drento in ta Bella Giggogin….
paste, bïra, gazêu.... tiæ sciù o scipäio!....

Oh! me sovvegne o sbarco de Marsalla,
e quello mäveggioso Krotokron:
s'aççendeìva platea, palchi, loggion....
bello vedde i pettêu fa: scialla! scialla! –

Chi sa e pêu dî cöse passava in quelle
belle testinn-e bionde tûtte riççi,
nîo de baxi, de frasche e de capriççi?....
Fæto l'é che nisciûn stava in ta pelle.

Frexetti e röbettin de tûtti i coî,
dosso bordosso i grendi co-i piccin,
ä rinfûza co-e rêuze i giäsemin....
o paeìva o teatro ûn gran masso de scioî,

o mëgio ancon, ûn pessettin de çê
vegnûo zù comme.... comme dî no sò,
degno d'ûn ode de Victor Hugo
che in ta penna o gh'aveiva de l'amê.

*
* *

Ma, cangiando speggetti, ho visto mëgio,
ciù ciæo, ciù netto, ho visto ciù lontan: