Pagina:Malinverni.Due.brocche.de.viovetta.1908.pdf/17

Da Wikivivàgna
Nêutte de S. Silvestro

Mëzanêutte: bevemmo! – mi, attraverso
a-o corallo do vin, ammio se trêuvo,
mi poeta impenitente, ûn bello verso
pe l'anno nêuvo.

Demmo in sce tûtto, zù, ûnn-a man de gianco,
e a-o tempo chi é passôu dimmoghe addio;
vortemose, indoentæ, in sce l'atro fianco...
e l'é finio.

Lastime, malûmoî, ragge, beziggi,
lägrime, doî de chêu, troin, lampi, sæte,
comme a rûmenta, passan pe i coniggi....
son cöse andæte.

No gh'é palasso, o casa de caroggio
che no gh'agge a çenetta pronta: - l'öa
chi passa e l'öa chi ven, con sto borboggio,
a ne demöa.

Co-a roba de bordatto o de vellûo,
co-a giacca de frûstannio o co-a marscinn-a
se pensa (intanto ven l'öa do stramûo)
tûtti ä cuxinn-a.