 |
Questa pagina a no l'è stæta corretta. | |
12
Da lì un pochetto o vedde pin de gente
Schiffo vegnì con ra vœga arrancâ,
E temendo de qualche inconveniente
Che a manaman no foissan dro Corsà,
Missose in guardia, o dixe: olà figgiœu!
Attenti a a scotta: ra pança me dœu.
13
Ma ghen za fotte bordo, e crian: Crestien!
Aggiuttæne, salvæne. Meschin noì!
Semmo, se nò o savei, Napoliten
Scappæ per refuggiâse chi con voì,
E per no cazze scciavi d'un Neron
Emmo lasciao ra Barca in abbandon.
14
Maglion de stucco, a st'improviso arrivo
De Gente spaventâ da fâ pietæ
A tutt'ommo se o n'è morto ni vivo,
Ghe dixe: pover'ommi e donde andæ?
Respondan: scia ne salve, scia n'aggiutte,
Gh'è là un Corsà, dixan che o sæ Margutte.
15
Come quando un figgiœu, che ra Bazæra
Sente di ch'a l'æ chi, presto a so Moære
O camiña, e a ro collo o se gh'affera,
O in tre cœusce o s'acciatta de so Poære,
Così i Napoliten per fuzze o laçço
Dro gran Maglion se asseguron in braçço:
