 |
Questa pagina a no l'è stæta corretta. | |
8
Ma per tirâ ra bella istoria avanti
Senza lasciâghe virgola ni punto,
Prima l'e ben parlâ dri caxi tanti,
Ch'en successi a Maglion, e come pronto,
Con testa fresca, e da bravo Pilotto
O che o battè, o che o salvò o capotto.
9
Andato a bon passaggio in pavariña,
O l'è squæxi a Gaeta; ma ûriaburia
Per sò mala desgrazia malandriña,
Vento de prôa ghe dè con tanta fûria
Che o fu obligao cacciâse a Talamon,
E sto caxo per lê fu bello e bon.
10
A i trei de Mazzo in fin, visto bon tempo
Væu sarpâ da sta Rada, con l'idea
De tornâ a so camin, e un contratempo,
Ma bon per lê, ghe guastò un pô ra fêa,
Che a ri quattro, œuggio di ro lundeman
Veire o descrœve, ch'en poco lontan.
11
Un miggio e mezo çirca a lê distante
Verso de çittavêgia o væ un Sciabecco
De Tunesi Corsà laddro forfante,
Con âtre veire, che o ghe creiva in becco,
E fra quelle o conosce doe Tartañe
Sfortunæ, e fortunæ Napolitañe.
