 |
Questa pagina a no l'è stæta corretta. | |
40
E zà o ghe voze a Prôa; ma in zenogge
Quelli salvæ meschin Napoliten
Cianzando, dre preghêre ghe fen dogge,
E un ghe dixe: Patron, fæne sto ben,
Che o Segnô ve benighe, o fato nostro
Se noi salvemmo ancœu, l'è pr'amô vostro.
41
Intrega, se pœu di, hei ra vittoria.
Rovinao ro Sciabecco senza squaxi
Ciù d'equipaggio, avei bastante gloria,
E ognun dovré laodave in tutti i caxi;
Ma e re nostre Tartañe retornæne,
Per amô dro Segnô sta grazia fæne.
42
Dri vostri infin chi gh'hei morto, o ferio?
Atro che sto figgiœu tra carne, e pelle,
Ch'o n'ha ninte, e doman o l'è guario,
Ma de voì chi mostrò prœuve ciù belle?
L'avei desfæto con sì poca gente
Un nemigo si forte, ve pâ niente?
43
Ma fæ conto d'aveiro pellucao,
E za menao con voi. Se in tro ciù bello
Sì rotto come o l'è, se v'è affogao
Allora Sciô Patron, che borgobello!
Perso hei ro stento, buttâ via ra pôve.
Ro seguro n'è lì, ve dirò dove.
