 |
Questa pagina a no l'è stæta corretta. | |
Scignorinn-e da marïo,
O seì ciù arraggiæ con mi?
Me rincresce... son pentio...
Femmo paxe, vegnî chi!
– V'ho composto ä bella mëgio
Quattro ciarle sorv'a-o Spëgio.
Dilettanti de pittûa,
Voeì fâ grazie ä mæ poexïa?
Vedde o mondo fâ figûa
Misso tûtto in gallerïa?
V'ho appaèggiôu di immensi quaddri
Pin de birbi, e pin de laddri.
Madaminn-e drite e storte,
Co-i contûssi da pagâ,
Professoî de piano-forte,
Figginetti da mersâ
Provvedeìve o mæ Lûnajo
Cö Banchiere e l'Usûrajo!
Scûzæ tanto, cäi beghin,
Se a pazienza a m'è scappâ,
S'ho parlôu di Campanin
Giastemmando o battaggiâ,
Perchè a mi, festa o no festa,
O don don me rompe a testa!
