 |
Questa pagina a l'è stæta corretta. | |
ello era staeto tanto como se convegniva, e ella gi dixea de andar a dormí. Ello, per amor de la discretium, incontenente obeiva, benchè monto gi paresse dose de star a leze queste cosse. E pregava la maere docementi, che ella lo iamasse per tempo, e no lo laxasse dormí tropo. E ella lo faxea discretamenti, metandosse da parte ogni teneressa humanna, per lo timor de Dee. E quando era faeto iorno, lo fantin insiva de casa per andar a lo deserto. E incomenssava a demandar la benixon a lo paere e a la maere. Elli gi la davam santamenti. E pregavanlo che ello tornasse la seira. Anchor lo pregavam e dixeam: “Fijor me, porta de lo pan con teigo quando tu vay cossì alla longa”. E(l)lo fantin benignamenti ne prendea alchuna vota. E cossy avea faeto per lo tempo passao, persochè ello era anchor pisenin. Andava a questo bosco, e andava monto pu in entro, e semper trovava pu bella[sic] cosse a lo so parey. E quando ello era andaeto un pocho, si se metea in quarche prao a seze e alchuna vota star in çenogium, e arecordavasse le cosse che ello avea lezue de Dee e de so lo so fijor. E savea ça che la nostra Dona era fuzía in Egypto con lo so Fijor, e si lo desirava de vey e dixea: “O Segnor, quando poré vey lo to Fijor e la soa maere, e quando me troveré con ello?” E de questo butava lacreme con devotion. E quando era faeto cossì un pocho, e ello se levava e andava cantando: Ave Maria, gratia plena, Dominus tecum et Benedictus Dominus Deus Israel, e atri versi li quay ello avea inpreyxi. Archuna vota trovava archun fruti sarvayghi, chi sum per li boschi, e pareangi belli e si li cosxea[sic] e si li paream boin, persochè gi levavam un pocho la fame. E incontenente s'apensava de adúne a messer e a madona, e cossy faxea. E comenssà a trovar de queste bestiore menue chi stam per li boschi, e incontenente corse a elle e pigiàle e abrasàle e miseselo[sic] in scoso, e adumestegávasse con elle e dixea: “Queste sum le cosse che Dee a faete, che dixea messer e madona che elle [eram] bestie salvayghe. De goarda como elle sum belle!”, e tegneivale in pocho e alegravasse cum elle e lasiavale andar. Queste bestiore vegnivam a ello e stavam cum ello, como le domesteghe fam cum noy. E se ello se trovava de lo pan, si ge ne daxea; e za no penssava: “Che mangerò?” Tornava lo fantin la seira, e semper aduxea cosse nove a lo paere e a la maere, de quelle che ello trovava. E dixeage queste nove, como ello avea trovao de le bestiore, e como elle eram faete e staete con seigo in scoso e introno. E lo paere e la maere lo aschotavam cum alegressa. E vegnivalo demandando de le cosse che ello faxea per lo deserto. E(l)lo fantin ge respondea alegramenti e puramenti.
Or vegne che lo fantin, andando per lo deserto, era tanto lo deleto che ello avea, che ello ze tanto avanti per lo deserto che sovravegne la note; e no ave tempo de tornar a casa, e forsa no vose, e no se ne arecordà.
