Pagina:Esopo Zeneize 1822.djvu/9

Da Wikivivàgna
Sâta a-a navegaçión Sâta a-a çèrchia

FOA I.
O Figgiêu, e o Lô.


Un Figgiêu un pö impertinente,
Dæghe a-o Lô, un giorno o sbraggiava,
Ahime mì! o me mangia!.... Gente!
E axillando i Bæ o portava
In t’un campo a pascolâ
Poco lonxi da-o Gexâ.

Corrin subito affannæ
Da ogni banda di Villen
De forchette e scciêuppi armæ,
Di Caccioêi con tanti chen,
Lé d’aveili fæti affiâ,
O se i misse a carregâ.

Poco tempo ghe passò
Che o scorriva un Lô davvei:
Dæghe a-o Lô! Gente (o sbraggiò)
Ch’o me mangia! no veddei!
O sentin quelli Villen,
Ma burlæ no ghe credden;

Comme un’Aquila o l’urlava,
Ma nisciun se busticcò;
Tûtti i Bæ o Lô ghe scannava,
E o ciù grasso o se mangiò;
Lé per miacoo o scappò via,
Ma o quintò a spellâ dä puia.

Chi per boxardo è stæto conosciùo,
Quando dixe a veitæ o n'è ciù credùo.