Cose son sti sospï, questo tremmâ,
Queste lägrime, scagge de diamanti,
Che ve veddo da-i êuggi zù stissâ
Con scandalo de tûtti i circostanti?
Coraggio, allon! belliscima Spozâ,
No-a battaggia d’amô mostraeve avanti,
No veddei che per poeive abberrûffâ
O vostro Ninno s’ha zà traeto i guanti?
Presto, via che diman quando ne-o Çê
Spuntiä ciù bello nêuvamente o Sô,
E voî stanca posiei sorva l’oeggê,
Languida a-i êuggi, pallidetta a-o cô,
Dieì, Rozinn-a, so son tinte d’amê,
O de têuscego e frecce dell’Amô.