Pagina:Donaver Antologia 1910.pdf/182

Da Wikivivàgna
Sata a-a navegassion Sata a-a serchia



9
Saræ ben cosa da matto,
Da fâ rie quello messê,
Se façendo un desbaratto
Desse gusto à voî, à lê.
Sì che dunque ho stabilio,
Per levâme da penâ,
D'attaccâme à ro partío
De tegnîve per scordâ.

SONETTI AMOROSI
I.

L'arco e ra corda vœuggio un di bruxâ,
Ri âtri arneixi, ra binda, e re saette
De quell'orbo d'Amô, perchè o me mette
A segno de doveime desperâ.

Se mi re spalle ghe vœuggio voltâ,
Minetta ven, con quattro parolette,
Un pô de boña cera, e dôe graçiette...
Semmo da cavo, e cose aggê da fâ?

Ghe veddo Amô treppâ sciù re parpelle,
Sciù ra fronte, sciù ri œuggi, e sciù i labrin,
E sgœurâghe sciù ri âtre bagattelle.

E ro mæ cœu subito o fà camin:
Sento un fœugo chi bruxa infin ra pelle,
E chi se pœu guardâ da st'assassin?