 |
Questa pagina a no l'è stæta corretta. | |
Fasso ogni dì chiù fæti che Gianchinna
Per vei se à ra fin fæta gh'è speransa
De muoeve à compassion, de rende mansa
Questa tigre superba de Zaninna.
Ra tegno intro bambaxo in pavarinna,
Ra prego, e l'unzo, me ghe buoetto in pansa,
Mà seben fesse chiù che Carlo in Fransa
Porto sempre à ro cuoe ra mesma spinna.
Che se ben de mirame à væ che porto
Ro sigillo dra morte in mì stampou;
Che no posso esse à chiù cattivo porto.
Con cuoe sempre chiù ingordo, e chiù abbrascou
Pa ch'à bramme de veime à drito, e à torto
Misso all'erboro secco, e affossinou.
