 |
Questa pagina a no l'è stæta corretta. | |
Quando d'in ato ma tutti arraggiæ
V(o)eggo vegni zù come tenti chen
Ri maroxi abbaiando à ro terren
Da puoe ri veggo tutti abbonassæ.
Mì, che aspeto ogni dì de vei cangiæ
Ri maroxi, onde sempre Amo me ten,
M'allegro, e me ri figuro li chien,
Da ro mæsmo retræto accoppiæ.
Ma quando veggo in fin che l'è finia,
Che se ben quelli ammortan ra sò raggia,
Per mì gh'è dì, e noette traversia.
M'accorzo à ro reverso dra medaggia
Che in questo Mondo, l'è bella spedia,
Ri nostri gusti son fuoego de paggia.
