 |
Questa pagina a no l'è stæta corretta. | |
XXXVI.
Ecco spuntà finalmente
A bell'alba fortunâ,
Dexideâ da tanta gente
Risoluta de piggiâ
A qualunque costo Argê
Cö Dey morto, o prexonê.
XXXVII.
Se fà veia, e và sfilando
Sorve o mâ quello gran bosco
Quæxi in Affrica arrivando
Con fâ l'orizonte fosco; (5)
E in vint'öe de bon camin
Van dâ fondo ao sò destin;
XXXVIII.
Ao sunnâ de çento bande,
Ao sussurro di tambûi
Se fâ o sbarco in varie bande
Ciû che in casa so segûi, (6)
Perchè in vedde a Bandëa Franca
O coraggio ai Turchi manca;
XXXIX.
Tanti scciêuppi i inorbiscian
Perchè illuminæ da-o Sô,
Tanti bravi i avviliscian,
I canôin ghe fan terrô,
I spaventa a Cavallaja
Sebben poca pe-a Barbaja.
