 |
Questa pagina a no l'è stæta corretta. | |
1
Dä scomparsa do Loro e da-o bordello
Che o l'ëa stæto a so primma conseguenza,
A son de micce l'ëa passôu do bello
Sensa poeine scrovî manco a semensa,
Sensa manco trovâ coscì a taston,
Quarche zobbo d'idea, de direzion.
2
No l'ëa manco da dî che ghe mollesse
O Paddre Spiritûale, o che a raxon
De sto bêuggio in te l'ægua a dipendesse
Da difetto de zelo e d'intenzion,
Ma scì balle! çercâ l[']é presto dïto
Se no s'ha ûn fî, se no se sà in che scïto.
3
Ch'ansi sûbito lê o s'ëa misso in caccia
Da-e botteghe, da-e serve, da-i portê,
Ma veddendose rïe quæxi in sciä faccia,
Mugugnâ çerte antifone derrê,
O l'aveiva capïo da-o doppio senso,
Che o caroggio do fî o no va in S. Loenso.
