 |
Questa pagina a no l'è stæta corretta. | |
RO RETRÆTO
DRO SERENISSIMO
GIAMBATTISTA AIROEU
Pe ra so Coronazion in DUXE dra Republica De Zena.
CANZON
Oh Muze care! Oh Apollo!
Assisteime, ve prego in sta ocasion.
Con l'arpa d'oro in collo,
Vorræ scrive in Zeneize una canzon;
E mette in vera luxe
Ri træti de sto nostro inclito Duxe.
2
Duxe, che d'altri a paro
Nomme grande o s'è dæto in ra Çittæ:
Da azunzero, e stamparo
In ri Fasti dra Patria Libertæ;
Per tegnjne memoria
In ra presente, e in ra futura Istoria.
3
Savei, che ho avuo l'incetta,
Ra vostr'ægua castallia in sciù ro monte,
De beive pura, e scetta
Fra ri Poeti Zeneixi; e rimme pronte
Aveiva: ma ri anni
Sciugan ra veña; e portan dri malanni.
4
Mi non hò ciù Fariña
Da mette sciù barança da cantà,
Non hò ciù testa fiña,
Un Eroe de sta fæta per laudà.
Se me dæ un pò d'agiutto
Voi, con Balin, spero sciortj da tutto.
5
Balin, ben conosciuo
Con ro so pescio vivo intr'un çestin;
Tanto ben reçevuo
Sotto ro nomme d'Ambasciaò Balin,
In ra Coronazion
Dro quondam Duxe Zorzo, Çenturion.
6
Quello chi m'ha insegnaò
A tescie qualche strofe in bon Zeneize.
Çento votte hò cantaò;
E a Zena re mæ rimme en ben inteize.
D'Arcadia son Pastô.
Muse! Fæ che mi gode questo onô.
7
De Giambattista Airoe,
Da Poeta, e Pittô farò un retræto.
Dirò, che o l'è un Carzoeu
D'Amistæ, de coeu, e d'añimo ben fæto;
Che intorno a ra Persoña,
Re ciù degne Virtù ghe fan coroña.
8
Ommo amigo dell'ommo.
Scetto, sincero, affabile, compjo,
Fondo de galant'ommo.
Amaò, stimaò da tutti, e riverjo.
Pronto a fa ogni piaxei,
Senza offeiza dro giusto, e dro dovei.
9
Nemigo diciaraò
Dra superbia, avarizia, e sò seguenza.
Ghe stan sempre a ro laò
Giustizia, accompagnà da ra clemenza.
Ro spegio, e ro serpente
Quella che ha in man, voeu staghe sempre arrente.
10
Con qualitæ sì rære
Un ommo a primma vista è conosciuo.
Ri Voti a çentanære
Voeuran che o segge Duxe! e l'e dovuo!
Jeri in graou da privato,
Ancoeu Prinçipe, e Duxe. Oh bello sato!
11
D'oro un scettro a ra man,
Coroña in testa, e Porpora Reale.
Tutti ri Ceti, van
Ad inchinaro in re famose sale;
Che poæran preparæ
Per le solo: in sto giorno adoeuveræ.
12.
Fæto sto primo sbosso;
Bezoeugna attentamente repassâro:
Con cæri e scuri adosso
A coroj dri finissimi accordaro;
E mette in vero giorno
Per ra sò luxe tutto ro contorno.
13.
Dunque tornemmo in fæto.
Andemmo a veiro in Trono maestoso,
Aplicaò tutto affæto
A ro publico ben: sempre ansietoso
De fâ ro sò dovei;
Rende a tutti giustizia, e con piaxei.
14.
Stàsene sciù all'averta
Drito in pê intr'un salotto a dâ udienza.
A tutti porta averta,
Per sbrigâ i ricorrenti, con pazienza.
Pin de boña manera,
E a nisciun faghe mai ra brusca cæra.
15.
Provede con affetto.
A Vidove, a Pupilli dâ conforto;
Faghe portâ respetto;
Perche non ghe sæ moæ un cavello torto;
E adoeuverâ pesante
Ra man con l'insolente, e ro birbante.
16.
Sæ povertæ, o richezza;
Retta giustizia, senza distinzion.
Resoluzion, franchezza.
Torto a chi hà torto, e raxon chi hà raxon.
Ognun cria de bon coeu:
Viva, e straviva Giambattista Airoe:
17.
In tanti Magistrati
Dra Casa de san Zorzo, e de Paraxo;
In Toghe de Senati,
Questo sistema non s'è dæto caxo
Che o l'aggie mai cangiao:
E sciù sto pê o s'è sempre manezaò.
18.
Miræ con che decôro
Ove sosten ra Dignitæ Ducale!
Per tutto brilla l'oro;
Mobilia, gran Banchetto a ra Reale!
Giubila ra Çittæ
De tanto lustro, e generositæ.
19
Prinçipe, e gran Modello,
Ra nostra Libertæ per sostegnj:
Spegio, e Retræto bello
Per chi sta Dignitæ deve crovj;
E rende illustre, e æterno
Ro nostro Feliçissimo Governo.
ZENA 1783 Da ri Eredi di[sic] Adamo Scionico
CON PERMISSION.
