 |
Questa pagina a no l'è stæta corretta. | |
Mezzi pe ottegnî un impiego.
Serve assæ, Pippo cäo, che seggæ
Dotto, onesto, fidato, zelante,
Serve assæ che corrî, che breghæ
Pe ottegnî quell'impiego vacante,
Gh'è o Sciô Togno chi striscia d'ogn'öa,
Poi per lê s'impegnò ûnn-a Scignöa.
O Giûdiçe incorrotto.
Voendo vinçe Grighêu fêua de raxon
Unn-a lite strapersa, o presentò
Quattro roscinn-e a-o Giûdiçe Arpagon,
Che giûstamente offeizo o e ricûsò:
Ah! o l'è stæto Grighêu troppo imprûdente
D'offerîghe o pacchetto in faccia ä gente!...
O Mego bravo.
Dappertûtto se vanta o Mego B.
Che da doppo ch'o fa sta profescion,
Nisciûn marotto s'è lagnôu de lê.
Scignori! o l'ha raxon:
Tûtti quelli da lê stæti cûræ,
Meschinetti! in duî giorni son creppæ.
