 |
Questa pagina a no l'è stæta corretta. | |
PE UN SPOSALIZIO
Teddeum! che finalmente l'è arrivôu,
Doppo tanto penâ, tanto magon,
Quello giorno de guæra dexideôu
Da mostrâ chi ha ciù forza e o coêu ciù bon.
Oh momento! o düello fortûnou!
Da dexideâse d'ëssine o campion,
E pèrdighe magara finn-a o sciôu,
Se un de duî no se rende a discrezion.
Baxi, sospii, caresse, abbrassamenti,
Lingue che sghêuan dall'ûnn-a all'atra bocca,
Sguardi teneri, treppi, svenimenti,
Son questi i mezzi da combatte a ròcca,
Son da battaggia i ûnici strûmenti...
Dæghe drento, Spozoeì, che a voî ve tocca.
