Pagina:A.Colombiade.Pedevilla.1870.pdf/95

Da Wikivivàgna

47
Fra queste donne somme per potenza
Montando e primme quattro ô pedestallo
Riçeveivañ da-i genii da Sapienza
O globo unio cö lucido metallo;
E tutte intorno ä so circonferenza,
Lasciando fra de lô pægio intervallo,
Con man robusta e con ô brasso teiso
O tegnivan immobile e sospeiso.

48
Cianzendo a quinta allôa pe teneressa,
E a l'Eroe lì vixin dando un abbrasso,
E in quella fronte piña de saviessa
Stampando un baxo a se ô piggiava in brasso,
E con l'affetto mæximo e co-â stessa
Façilitæ che a moæ a porta un ragasso
Da-e compagne portandolo con lê
In sciö globo a-ô metteiva drito in pê.

49
E all’Eroe stesso subito dappresso
Slançandose in sciö globo a s’assettava,
E con un atto, ne-ô quæ paiva espresso
Rispetto e amô, e zenogge a gh’abbrassava:
Da sei genii a Sapienza a-ô tempo stesso
In aia sollevâ a l’incoronava
Con esprescion de stimma e gioia viva
Con coroña intressâ d’öfêuggio e d’oiva.

50
I atri genii allôa con allegressa
Chinavan zù in sciö vasto basamento,
E con arte mirabile e prestessa
Andavan terminando un monumento
Stupendo pe disegno e pe ricchessa;
Trenta colonne alzavan a-ô momento
E un architrave e un cornixon segondo
A gran base magnifico e rotondo.