 |
Questa pagina a no l'è stæta corretta. | |
CANTO VINTEXIMO
ARGOMENTO
Mentre che ô Scrovitô do neuvo mondo
Pe-a Spagna ô parte pe fâ manifeste
E so scoverte, ô genio iniquo e immondo
O sûscita a ciù orrenda de tempeste
Pe seppellîlo de l’Oceano in fondo;
Ma sarvôu da l’esercito celeste
Co-a so intrata trionfale in Barçelonn-a
L’impreisa a ciù ammirabile ô coronn-a.
1
A gran festa solenne terminâ
Co-i zêughi, ghe mancava ancon un’ôa
A finî a brillantiscima giornâ;
Scicchè avendo piggiôu gûsto ä demôa
Se continuava ô popolo a demoâ,
Façendo ä bella festa ûn pö de côa
Cangiandone però a solennitæ
Con ciù moto, ciù brio, ciù libertæ.
2
Seguiva ûn invexendo allôa, ûn intresso,
Uña gazzæa, ûn mormoggio popolare
Fra gardetti vivaçi d’ogni sesso,
Fra garzoîn bûlli e zovene bizzâre,
Che quæxi dillettavan ciù che ô stesso
Spettacolo pomposo e regolare,
Questo ciù ô l’esaltava a fantaxia,
Ma questo ô l’aumentava l’allegria.
