Pagina:A.Colombiade.Pedevilla.1870.pdf/637

Da Wikivivàgna

159
I ommi a questa specie de regatta
Estræti ëan questi quattro: Tamatoa,
Che në tempeste a galla comme a natta
O se cincia e fra i maoxi ô se demöa;
Zamoro chi è ûn bûffon e ûn gaggia matta.
Tati, ch’ô stâ sott’ægua ûn quarto d’ôa,
E ô fa a barba a-ô ciù bûllo di magroîn,
E Makè ûn’ægua coâ, ô re di furboîn.

160
A ginnastica di ommi a non ëa a stessa
Gh’aveiva e donne nûando pe cammin:
In queste dominava ciù a destressa,
Spiccava ciù ne-ô sesso mascolin
In tutti i movimenti a robûstessa:
L’agilitæ gh’ëa in quelle do delfin,
Ma questi quattro verso a meta van
Con l’impeto e l’ardî do pescio-can.

161
Benchè ne-a so veemenza giudiziosi,
Davan pûgni, pattoîn e casci a-ô mâ,
Che paivan energûmeni fûriosi;
E benedivan tûtto d’ægua sâ
Schêuggi, costa, canoe, ommi cuiosi,
I quæ immobili stan a contemplâ
Quelli rapidi e strani movimenti
E co-i êuggi e con tûtti i sentimenti.

162
Fra questi originali zovenotti
O ciù ch’ô fesse sciato ô l’ëa Zamoro:
Lê ûn pö ô fa fischi strani e ûn pö strambotti
O va cantando in ton aspro e sonoro,
Aôa ô fa çerti schersci e çerti botti,
Che i limiti oltrepassan do decoro,
O pâ ûn paggiasso e ûn satiro marin,
Oppù ûn Triton ch’ô fasse l’arlecchin.