Pagina:A.Colombiade.Pedevilla.1870.pdf/625

Da Wikivivàgna

111
S’impiva a-ô tempo stesso d’infinita
Quantitæ de piroghe a stessa radda,
Ghe lasciavan però ûn’andañia drita
A-a nave e larga comme ûña gran stradda:
Ma ëan tanto spesse che a manciña e a drita
Ghe paiva ûna vastiscima caladda
Immobile (l’ëa l’ægua queta e ûnia),
Comme a fa a natûa e l’arte in tæra e in pria.

112
E impivan e canoe in t’ûn battidêuggio
A miggiæa e persoñe allegre e leste:
A riva, a costa, ogni angolo, ogni schêuggio
Tanto s’impivan, quanto ëan piñe queste,
Chè da qualunque parte giavi l'êuggio
No veddeivi che ûn astrego de teste:
Spettacolo ô l’ëa questo, comme quello
Visto in scïâ spiaggia e forse ancon ciù bello.

113
Piggiavan posto in sciö carabottin
De poppa, preparôu ne-a stessa Pinta
Con stêue e con scambeletti con cuscin
(Comme proprio pe-a gente ciù distinta,
E comodo per vedde da vixin
Chi a-e varie prêuve a lotta avesse vinta)
I giûdiçi, i cacichi e i prescidenti
E i sûggetti pe rango ciù eminenti.

114
I zêughi in mâ doveivan iniziâse
Con uña sfidda strana e tûtta nêuva;
Sfiddava Ojeda sûbito a mezuâse
Con lê chiunque fra ô popolo se trêuva
De destrezza e ardimento ciù capaçe,
Dando pûbblicamente quella prêuva
Mæxima de destressa e d’ardimento,
Che lê ô dava pe-ô primmo in sciö momento.