 |
Questa pagina a no l'è stæta corretta. | |
63
Non scorraggio, nè scorçertôu da-ô guao
Do Selvaggio e da-ô fiasco do Spagnollo,
O piggia allôa ô cacico de Cibao
O tronco in spalla e ô se l'accosta a-ô collo;
E verso a meta subito l’avao
O piggia non da matto a rompicollo,
Ma con ûn passo fermo e regolôu
E con ô peiso ben equilibrôu.
64
E oltrepassôu ô l’aveiva zà a meitæ
Senza stento nisciûn, senza intervallo,
Marciando con fierezza e dignitæ
Redeno e franco comme marcia ûn gallo,
E in camallâ mostrando a gravitæ
D’ûn prinçipe e non aia da camallo;
Pû arrivando a duî tersci de cammin
L’ommo ô me ghe mollava ûn pittinin.
65
L’ommo ô l’ea forzellûo, ma ô non ëa miga
De færo, coscicchè ghe fù ûn momento,
Ne-ô quæ ô fù ûn pö senscibile ä fadiga
E quæxi a ûn ombra de scorraggiamento;
Ghe scuava zù de suô ciù d’uña riga
E dä fronte e da-i pôsi e zù pe-ô mento;
E gambe ghe cedeivan sotto ô grosso
Peiso, ô l’ansciava, e in cea ô l’ëa tûtto rosso.
66
Ma pû a-ô veddise a meta zà vixiña,
I prescidenti e i giudiçi promê,
De popolo a valladda tûtta piña
Con miggiæa d’êuggi tûtti attenti a lê,
Puia de fâ quarche figûa meschiña,
In faccia a tanti indigeni e foestê,
Verghêugna d’ûn pittin de debolessa
O so ardî a l’animava e a so fieressa.
