 |
Questa pagina a no l'è stæta corretta. | |
75
Ma a questi, benchè ô chêu ô no ghe mancasse,
Non avendo rinforsci comme lô
Començava a mancâghe a forza a-e brasse;
Paiva un abbosso d’ûn intaggiadô
Tutto ô so corpo e i vestimenti strasse:
Gh’inciastrava cö sangue mesccio ô suô
I membri stanchi, i abiti, e camixe;
Tanto ô l’ëa ô stento! tanti i taggi e e frixe!
76
Ma fra-i guai formidabili, fra-e tante
Peñe e angûstie, da-e quæ lô ëan circondæ,
O guao ciù pezo ô l’è toccôu a Ferrante.
Lê ô paiva a l’ardî, a l’impeto, a-e sciabbræ
In quello giorno un cavaliere errante
Di ciù bûlli da-i poeti decantæ,
Gh’avieva[sic] dæto, se ô vedeiva, Ariosto
Fra-i Ferraûtte e fra-i Gradassi ûn posto.
77
O che de fedeltæ in quell’occaxion
Dâ uña prêuva a Colombo ô l’intendesse,
E fâ un’emenda da so ribellion,
O d’espiâ e nêuve e vege debolesse,
O che ô punto d’onô e l’emûlazion
Avessan parte in quelle so prodesse;
In sommma, ô fæto sta, comunque segge
A cosa, ch’ô façeiva de mavegge.
78
Ma mentre che con fûria non diretta
Da-ô giûdizio a streit’êuggi lê ô s’avansa
In mezo di selvaggi, e ô trincia e affetta
Quanti ô n’intoppa, quelli con a lansa
Che punzan pe risposta e pe vendetta
E spalle, ô collo, i anche, ô peto e a pansa;
E e puntûe che façeivan non ëan zà
Da poeî guarî con fiarsoe o taffettà.
