Pagina:A.Colombiade.Pedevilla.1870.pdf/313

Da Wikivivàgna

47
E aôa a corriva a säti da giganti,
Poi tanto adaxo, che d’Alana i pê
Da-e so carcagne ëan quattro die distanti;
Aôa a ghe fava un giëto de derrê,
Aôa un sätetto, oppù un squaccin davanti,
O a s’accucciava pe aspettâlo lê:
Un asbrio poi piggiando a se fermava
Depuî a ûn erboo e a rievâ e l’aggueittava.

48
A forza de ripete questo zêugo
S’avanzavan seî miggie nell’interno;
Ne-o chêu d’Alana s’accresceiva ô fêugo
Do spirito lascivo de l’Inferno,
Perchè ô no poiva avei libero sfêugo;
E a-ô stento e a-ô cado in quello gio eterno
Se gh’azzunzeiva pù a verghêugna e-a raggia
Che in destrezza a ô vinçesse uña selvaggia.

49
Persuaso ä fin ch’ô sûava inûtilmente
Zà ô cedeiva; ma a donna a uña risorsa
A ricorriva ancon ciù seducente:
Capitavan pe caxo in quella corsa
Presso ô brasso d’un limpido torrente
Dove i ægue ëan profonde e senza forsa;
Ozela allôa a se streppa a so çentûa
E a se ghe bolla dentro tutta nûa.

50
E ne-ô cristallo trasparente e fresco
Di ægue co-i anche, e brasse e e gambe snelle
Con gaibo, scherso e brio tutto donnesco
Tali scene a façeiva che con quelle
A l'aviæ fin costreito San Françesco
A strenzise ô çilizio intorno ä pelle:
Alana nêuvamente ô l’ëa tentôu,
E ô se fermava a veddila incantôu.