 |
Questa pagina a no l'è stæta corretta. | |
127
E che persuasi tutti in conseguenza
Voi seggiæ in questo giorno finalmente,
Comme ô l’ëo mi (me ô favan a prudenza
E a modestia taxei), che çertamente
Me destinava a tanto a Provvidenza,
Mi ch’ëo foestê fra voî, mi non potente,
Mi in faccia a-i ommi matto e vixionaio,
Mi in faccia a Dio servo non necessaio.
128
Ma perchè ne-a manea ciù esatta e esteisa
Voi sacciæ, comme quella a preparasse
Mi stromento non degno a tanta impreisa,
Comme lê ardî e costanza a m’inspirasse
Contro ogni contrattempo e umana offeisa,
Comme quæxi per man lê a me guiddasse,
Cose ignoræ, perchè fan parte tante
D’una vitta privata e sempre errante;
129
E perchè se con voî in Spagna ô ritorno
Me foîse dall’Altiscimo negôu,
Posse saveî tutta l’Europa un giorno
Per bocca vostra esatto e dettagliôu
Un evento, ch’ô sä dä fama intorno
A-a Tæra in tutti i tempi decantôu;
Per questo fin de tedio (comme penso)
No ve sä forse a storia che incomenso.
