Pagina:A.Colombiade.Pedevilla.1870.pdf/107

Da Wikivivàgna

96
Temendo anzi, che forse ô saiva incorso
Fra-i ombre in quarche guao, dove chi incappa
Lontan da un amichevole soccorso
Da un grave danno a gran fadiga ô scappa,
Pe trattegnî de caravelle ò corso
Mette ô façeiva tutte e veie ä cappa,
Fin che do mâ chi ëa intorno a-ô nêuvo mondo
Co-a luxe ô conoscesse i schêuggi e ô fondo.

97
I angei, che aveivan finn’allôa di venti
Fæto e veci con sforsci sovrumani,
Trattegnivan lô stessi i bastimenti;
E poi sgûavan veloci in sce Guanami
Lì vixiña a inspirâ di sentimenti
Pacifici ne-i semplici isolani,
E opponîse[sic] a Maboia, che ancon ciù
Ardio da Cubba ô ritornava in zù.

98
Mancava ancon d’un’oetta ô spazio breve,
Perchè l’Aurora in çê a fesse ritorno;
Comme a pregâ a so bella che a i solleve
Da-e so peñe i amanti stan d’intorno,
Coscì i Spagnolli pregan che a se leve
Presto per annunziâghe ô fâ do giorno,
E stan spionando co-e pupille fisse
O primmo ciæo che a tæra ô descrovisse:

99
Con l'allegra e feliçe prevenzion,
E con ô battichêu de gioia inqueta,
Che in teatro ô segno de tiâ sciù ô telon
Tutto impaziente ô popolo ô l’aspeta,
Çerto de gode a bella produzion
D’un meistro de cappella o d’un pöeta,
E gren cose ô l’immagina, e ô piaxeì
O gusta zà, ch’o l’è segûo d’aveì.