 |
Questa pagina a no l'è stæta corretta. | |
92
A notizia frattanto da comparsa
D’un lumme, che de tæra ô dava indizio
In fra-e squaddre spagnolle essendo sparsa,
Queste, a-e quæ d'incredibile supplizio
L'ëa l’inçertezza e uña speranza scarsa,
Comme a-ô vivo brillâ d’astro propizio
Invexendæ pe vedde ô lumme allôa
Coran, s’urtan, s’ammuggian verso â prôa.
93
Ma mentre fissan senza parpellâ
Quella lûxe, ô cannon sparava a Pinta,
Ch’essendo de træ nave a ciù innoltrâ
A tæra a poiva vedde ciù distinta;
Seguiva ô sparo in quello vasto mâ
De gioia un crio fin a-ô delirio spinta,
Che a çertezza da tæra lì presente
A produeiva ne-i chêu de quella gente.
94
De questa a gioia niateriale affæto
A pêu capî, chi ô ben a intende arriva
D’ëse passôu da morte a vitta a un træto;
Ma a gioia dell'Eroe ciù pûa, ciù viva,
Figgia d'un chêu magnanimo e ben fæto,
D'un spirito sublime, chi capiva
L'utile immenso de scoverta tale,
Questo ô no pêu spiegâ lingua mortale.
95
L impazienza e l’eccesso d’allegria
Poco o ninte lasciando allôa riflette,
Che foisan, pretendeiva a compagnia,
E nave â tæra subito dirette;
Ma frenando l'inqueta frenexia
O no ghe ô voiva per allôa permette
Quanto forte ne-i rischii l’ammiraglio,
Canto atrettanto ne-ô prevedde un sbaglio.
