Ms. Ricci 176/Lettera scrita da Momo all Ill.mo Sig. Fransesco Maria Imperiá capitannio de Sestri

Da Wikivivàgna
Poesie in lengua Zeneise de Giurian Rosso
Lettera scrita da Momo all'Ill.mo Sig.r Fransesco Maria Imperiá capitannio de Sestri
Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

[p. 195r modifica]

Lettera scrita da Momo all'Ill.mo Sig.r Fransesco Maria Imperiá Capitannio de Sestri


1
Mi che la sciusa in cé fasso l'ofitio
Fra ri Dé de ciù stofa, e de portata,
Tant'a dí dra virtù, comme dro vitio
De taggiá sciù quarch'un ra Pasquinata;
Quello ch'in vitta mé sempre ab initio
N'ho muoé sapuo dí ben d'annima nata,
Per zò da ri Aristarchi veneroù
Ro Dio dra maldicensa son ciamoù.

2
Ma così maldicente, e despetatto
A cangiá compression forsa me sento,
Così commanda resoluta in atto
L'Aquila Imperiá dro firmamento.
Comme l'Aquila vuoe, no gh'è recatto,
Perchè ghe ten ra man sotta ro mento,
In paxe in guerra dose altitonante
Ro poere di[sic] colleghi altitonanti.

3
L'atra mattin ch'in ro superno coro
Ri Dei, che sciù ro gotto se ne stavan,
E l'un con l'atro allegri in consistoro
Dri feti dell'Italia raxonavan,
Eccat'in quello un tremeluoerio un loro,
Dre voxe, che d'in terra in cé montavan,
E ri vapoí, che ro só tira a lé
Ghe favan ra spallett'a montá in cé.

[p. 195v modifica]


4
Unna vittuoeria, un sguoexoro, un dramaggio,
Ro duxe, e ri compagni sé bioù
A mandan'un si degno personaggio
Beneito sé ro cé chi l'ha inspiroù,
E viva, e brindi, benevenga maggio,
Beneite balle, chi ghe l'ha mandoù,
Finna ri sassi ancon tra monti, e valle
Respondeivan da cuoe: beneite balle!

5
Ri mesmi morti d'in tra seportura,
Pareiva che criassan: viva viva,
Eccave chì de nuoevo, ò zoventura,
Ro secolo dell'oro in questa riva,
Con Giove in ascendente per ventura
L'oxello rè dri atri our'our'arriva;
Così in sto mentre a gora de lavello,
Sento re Donne dí: beneit'oxello!

6
Ma Venere in sto ponto, che con Marte
Stava d'arte de scrìmia a discorrí,
Diss'a Vulcan, chi stava la in desparte:
Ciapusso caro, andé un po li a sentí,
E mi con lé tirandose da parte
A ro barcon trottando tutti doi,
Vegghemmo che ste voxe tutte quente
Vegnan lanzé da Sestri de ponente.


7
Così mentre d'in cé ben s'accorzemmo
Ch'in terra no se soulan de lodá
E d'erze sciù a re stelle ro suppremmo
Merito d'un Fransesco Imperiá,

[p. 196r modifica]

E Giove mesmo con sò gusto estremmo
Ghe vè pre insegna l'aquila portá,
Passa parolla a sento voxe in choro
Fransesco Imperiá l'è un ommo d'oro.

8
Si che mi mesmo vistome sforzoù
Da ra voxe dro popolo e dri Dé
Eccave chì che Mommo inamoroù,
Cangia ra colloquintida in amé,
E comme vostro s[c]ciavo incadenoù
V'oré puoei mette sciù ri sette cé,
Si ben no diré ben quanto conven
Se quanto sò dí mi dixesse ben.

9
Donca zà che v'aspetan ri Sestrin
Comme ri Hebrei za favan ro Messia,
Incamineve e con vuoi vagghe in fin
Consciorte così degna in compagnia,
Re baranze d'Astrea piggié in tre moen
A seze in tribunale andé pu via
Che re sedie terrenne, se no m'aro,
Son per vuoi dra celeste ro caparo.