Ms. Ricci 176/In lode dell'isora Paradiso Terrestre dro sig. Giruoemmo Spinnora

by Giurian Rosso

←torna a l'endexo

Poesie in lengua Zeneise de Giurian Rosso In lode dell'isora Paradiso Terrestre dro Sig.r Giruoemmo Spinnora

Bonna scoréga e bon prinzipio d'anno a ro Sig.r→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

In lode dell'Isora Paradiso Terrestre dro Sig.^r Giruoemmo Spinnora

Quando in ri primmi tempi ro Segnó
Fè sto mondo si bello e si riondo,
O fè tra i atre cose de stupó
L'isore fortunate in fin dro mondo.
Puoescia in un serto tempo unna de ló
Se ne scuggià invisibil'a ro fondo,
Ma ro Segnó mi diggo o ra levà
E in questa zimma chì ra trasportà.

E se primma isorá da ra marinna
L'era fra tutte ra ciù bell'e bonna,
Oura, comme s'a foise unna reginna

Ghe forman questi monti ra Coronna,
Ra Scrivia e l'Orba a gara in Pavarinna
Ri pé ghe baxan comm'a sò patronna.
E con egue brillanti d'ogn'intorno,
Ghe fecondan de pesci ro contorno.

In questo luoego ameno e ben formoù
Serere, e Bacco dosemente uscij,
Pá ch'haggian ra buttega trasportoù
Dri buoin gren, dri vin dosi, e savorij,
Ri fruti pin de nettare bioù
Da ra rosá seleste benexij
Son si dosi che l'hommo se gh'inganna
Se son fighe, ò son peire, ò se son manna.

Chì se sente ogni di ro rossignuoe
Tirá ra gorgia, mentr'Amó ro ponze,
Che pá ch'appont'autunno fruteiruôe
Con primmaveira bella se conzonze,
Chì no arrivan penne, ni anticuoe,
E chì superbia, ò ambition no zonze,
Chì senza che se litighe, ò se ciete,
Ghe nua per fin re pegore in tro lete.

Festosa pe ro proù l'aura tranquilla
Baxa cian, cian l'erbetta, e via trapassa,
L'ava intorno a re scioi mormora, e brilla,
Ro ventixuoe gioioso ra descassa,
Fin ra mosca sarvega s'inaxilla,
Aspetando se Venere ghe passa,

Mentr'in zimma dra canna in sciù l'erbetta
Stà ro grillo a cantá ra Girometta.

Spira l'auretta dose a rende odoi,
Fresca in scoso all'herbetta ra vivagna,
Chì se mes[c]cian re Gratie con ri Amuoi,
In paxe accorsetté per sta campagna,
Tra re ciere dre Ninfe, e tra re scioi
L'oeggio, e ro naso human se pá in cocagna,
Ste bellezze, quest'ere, e sto diporto
Faren drissá fin l'appetito a un morto.

Cose ghe manca in fin? Cose non gh'è?
In materia de caccia e ancon de pesca,
Se per fin sciù ro ponte se ghe vè
Ch'unna man spara, mentre l'atra pesca,
Re pernixe da ló van in tra rè,
Re levere se ven per l'herba fresca,
Sercá ra radiccietta d'in tre rave,
Per fin che ro s[c]ciuppetto ne re cave.

Per stá megio sto luoego in Pavarinna
Ghe mancav'un [commando] bell'e bon,
Onde ch'unna patronna [anzi reginna]
Ro Cé gh'ha deto, e un ottimo patron
A dighe ch'a pá l'Isora d'Alcinna,
Basso è fra ri patroin ro paragon,
Pareiso in fin mi ghe direiva giusto,
Ma se ghe mangia in fin con troppo gusto.