Ms. Ricci 176/A ro sig. N. - Lustrissimo patron Per quanto posso vei
| ←torna a l'endexo | Poesie in lengua Zeneise de A ro Sig.r N. |
A ro Rev.do Padre N.→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissimo patron
Per quanto posso vei
Lié se piggia piaxei
Ra mé musa burlá
Con daghe da grattá
E lié pe amó de vostra signoria
L'è pronta a informaggiá ra toffania
Eccora chì lestissima
In pié comm'unna pertega
Che tutta a se revertega
E con gioia indicibile
L'è per fá ro possibile
Piggiando per fá quanto è necessario
Re spetie e ro formaggio in tre l'armario.
De fá corzetti avido
In Pindo Appollo giubila
Clio ras[c]cia ra meisera
Sta ziassando Talia
Tira l'egua Melpomene
Erato sciuscia e mette per fá fuoego
Ben re s[c]ciappe dre legne a ro sò luoego
Ra viegia rabbioera
Tersicore strascinna
Sciù ra so grattarinna
Eccave che de fira
Euterpe ve ri tira
Calliope ve ri buoetta agil'e destra
E cadi cadi ancon ve ri ammenestra
Piggia ra dott'Urania
Ro tondo e ghe l'appara
Polinnia ve ri sara
Così re nuoeve muse
Dixan: voscià me scuse
Mentre tutte s'oreimo puoei desfá
Per ro merito vostro Imperiá
Con re muse d'accordio
Presto dall'atra banda
Giurian ve ri manda
Inchinandose a vuoi
E se non son meggioi
Resté de perdonaghe persuaso
Non se può fá ciù de meggio in Parnaso.