Ms. Ricci 176/A ro Sig. Gio: Maria Spinnora - Invio a ese Compá

by Giurian Rosso

←torna a l'endexo

Poesie in lengua Zeneise de Giurian Rosso A ro Sig.r Gio: Maria Spinnora - Invio a ese Compá

A ro Sig.r Zane Fransesco Grimado Capit.o de Sestri→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

A ro Sig. Gio: Maria Spinnora

Invio a ese Compá

Lustrissimo Patron, v'aregordavo,
Renego ro Diavo,
Che nuoeve meisi fa m'interpellassi,
Quand'a Votri lasciù me rebellassi,
Diggando con ro gotto così in man,
Brindesi, ò Giurian,
Brindesi a quello mas[c]cio, che fra noi,
Haverà pe ro primmo un de noi doi?
E che lantora mie
Resposi senza rie,
Patron poressi ancora deviná,
Ma s'a me resce v'oeggio fá compá;
E vuoi lantó con ra risposta fita
Me dixessi: l'è dita?
E bè, quando lantora a cà tornei
Trovei Cecilia, e parte ghe ne fei

E si ben m'inzegnei
Per faghe con sodezza penetrá,
Ch'a s'aguardasse a non me ghe lasciá,
Ch'in fin senza locciá,
In somma non vá a dí
A m'e riuscia primmo a mi ch'a vuôi;
Mentre questa mattin nostra moggié,
Mediante sempre ro superno aggiutto
Prest'e ben, sciù doi pié
A me ne ha fet[o] un mas[c]cio dro tutto.
Si che, per gratia sò, l'è molto honesto,
Ch'un di quande vorrei femmo ro resto.