Ms. Ricci 1080-1/14
| ←torna a l'endexo | Ms. Ricci 1080, sec. XVIII La serva innamorata |
Lamento de Lucretia→ |
1
Vegno da vuoì Signoa
per un poco de conseggio
zà che da ogn'un me veggo
abbandonà
2
Si ve voeggio contà
se me stareì à sentì
cose da fà stupì
ogni personna
3
Mi povera garzonna
son tanto tribulà
che non sò cose fà
dri feti mè
4
Vorreiva un conseggiè
chi me puoesse conseggià
come me don governà
con me Patronna
5
Perche liè se ten bonna
de fame despeà
per che son innamoà
d'un zovenetto
6
E per parlave schietto
a me ha trattoù de dà
se a me ghe vè parlà
da ro barcon
7
Si son d'opinion
che mi no porrò stà
se o sento sigoà
de non ro veì
8
Sò che forsi dirrei
gran caso bell'astò
si ben ti no fè l'amò
con ro gallante
9
Ma ghe n'è steto tante
che m'han deto raxon
con dì: t'ho compaxon
me ne fa mà
10
Se a ro sente passà
de sotto à ro barcon
a ven de regueiton
sempre agueitame
11
E se voeggio avansame
un poco à ra ferrà
per vorreighe parlà
manco a non vuoè
12
Si a manda ri figgioè
se vaggo à ro fornà
chi staggan à mirà
ben cose fasso
13
E puoè quando siasso
ò che fasso ro pan
sempre ho ro guardian
per ra coxinna
14
Pensè come meschinna
mi me ra don passà
de no puoeì regallà
ro mè gallante
15
Si và poco che cante
con dì ra me raxon
che fin con ro baston
liè me menassa
16
Ro meschin se ra passa
de vegnì con ro fornà
ogni seira à cantà
ra Giometta
17
Con un'atra canzonetta
dra bella Margaitta
con tutta ra sò vitta
e ra sò morte
18
Si o sbraggia tanto forte
che tutti ri vexin
se fan à ri barcoin
quando ro sentan
19
E tutti se contentan
de sentiro cantà
insemme con ro fornà
de compagnia
20
Ma se ro sente ra stria
de quella mè patronna
a me fa sempre imbugnà
tutta ra seia
21
Con dime, che a vorreiva
che ghe desse lisenzia
che se no in sò presenzia
a me darà
22
E de ciù che a farà
saveio à mè Patron
pensè un pò s'ho raxon
à lamentame
23
Ma non vuoeggio astissame
voeggio lasciara dì
e quando a va à dormì
parlaghe un poco
24
Che l'è ro miè conforto
e tutto ro mè ben
che quando o no ghe ven
son fuoea de mie
25
Vorrè che o fuisse chie
per mostravero un poco
per vei s'ho raxon ò torto
à vorreighe ben
26
Che ogni votta c[']o ven
sotta ro mie barcon
mi vaggo in barlugon
per allegrezza
27
E quando ro veggo à messa
sempre o stà aspettà
si o me ven accompagnà
fin sciù ra porta
28
E quando o l'ha ra sporta
con quarcosa de bon
sempre o me dà occaxion
che o ringrazio
29
Si o no sarrè muoè satio
de vorreime ringrazià
purche oresse assettà
ra cortexia
30
Ma per che quarche spia
non vegne à mette mà
non m'incallo à piggià
cose o m[']uoè dame
31
O ven sempre à gueitame
e l'ho sempre adderrè
se son con ro paniè
per Ciazza Nuoeva
32
E puoè quando o me truoeva
in Ciappa, ò à ro Maxello
sempre con ro cappello
o me sauua
33
E quando per ventura
ro mostro de no veì
che me piggio piaxeì
faro astizzà
34
Vuoì ro veì passeggià
fascioù come un dezerto
con dì: cose haggiè feto
à questa chie
35
Mi me ne ven da rie
ma si ben me ne fa mà
che no posso quietà
se no ro miro
36
E liè con un sospiro
me dixe: ro miè cuoè
dimme cose ti vuoè
da a mè personna
37
Lantoa me tegno bonna
e per fao desperà
ghe diggo: lascieme stà
andè in bonnora
38
Se ro vissi lantora
addentase ro dio
diressi: l'è spedio
ro meschinetto
39
O me scontrà in Campetto
un giorno à raxonà
con un serto mersà
de Sant'Andria
40
O l'intrà in giroxia
o vosse fà costion
se à caso me Patron
non capitava
41
Ro meschin se pensava
che l'havesse scartoù
che o non haveiva ciù scioù
da puoeì parlà
42
Ma lasciemolo andà
con ra sò girosia
e trattemmo de quell'arpia
de me Partonna
43
Chi ha dito à unna personna
che a no vuoè che me marie
che a vuoè che stagghe lie
per fin che scampe
44
E che à ro miè galante
a ghe farà parlà
con faghe commandà
che o no ghe viegne
45
Ve creivo che a me tiegne
mi dro tutto soggietta
povera garzonetta
innamorà
46
A me vuoè fà despeà
se quarchum per caritè
no se muoeve à pietè
de mi meschinna
47
Ò che quarche vexinna
ghe digghe a raxion
che a l'aggie un pò compaxion
à esta garzonna
48
E che come Patronna
ghe aggiuste ro sò conto
zà che ro zove è pronto
de spozara
49
E serche d'aggiustara
aura de Carlevà
che possemmo mangià
quarche nisuoera
50
Voeggio fane ra proeva
dirò à sò commà
se a voresse trattà
questo maiezzo
51
Che l'è donna de manezzo
pù che a ne vuoeggie uscì
a ghe saveà dì
ben ra raxion
52
Dime senza paxion
se ve pà che digghe ben
mentre che liè me ten
così soggetta
53
Vuoeggio mandaghe questa
chi ne trarà ri piè
cje s[']a fa ro mestiè
pollitamenti
54
Si finian ri centi
ri affanni, e ri dorouì
che patimmo tutti duoì
per quest'amò
55
E così con onò
tutto se finià
e ciù non se darà
da mormoà
56
Mi non posso quietà
per che non truoevo luoego
che pà ch'aggie intro fuoego
.:ro miè cuoè
57
L'ho tanto ben in cuoè
che mi ghe vuoeggio ben
per ro conto c[']o ten
da me personna
58
E se non fuisse me patronna
ve zuo in veritè
che me ro piggierè
fin de sta seia
59
Ma ro meschin voreiva
che se fesse ben tutto
per sercà de dà gusto
à i parenti
60
E fà ri complimenti
come se suole fà
quando quarche sposà
dixe de sie
61
Ho ben non sò che, chie
cose c[']o m'ha donoù
che non v'ho mensunoù
ro qua[sic] son belle
62
E ra virtù de quelle
se ve re mostrerò
insemme ve dirò
de compagnia
63
Ma prima in cortesia
ve vuoeggio domandà
che me voggiè regallà
de quarcosetta
64
Se ghe haveì quarche michetta
de quelle dro fornà
ò quarch'osa de lecco
tutt'e bon
65
Aggieme compaxion
se serco de piggià
che fasso per regalà
ro miè moroso
66
Che l'è tanto gratioso
che se ro conosciessi
sò che non ve faessi
ciù pregà
67
Hosciù starò à spettà
ra vostra cortesia
fa che posse finia
con piaxei
68
Zà che veggo che seì
signora si corteise
ve ro dirò in zeneize
grammarsè
69
Vorreiva esseve appè
per basciave re muoen
e quanto se conven
ringraziave
70
E vorreiva lasciave
per non ve tedià
ma voeggio prima mostrà
cose v'ho dito
71
Gh'ho prima chi un scrito
che liè si me ha mandoù
quando o s[']e innamoroù
dri feti miè
72
Donde o scrive che liè
patisce per amò
gran penna, e gran dorrò
con gran tormento
73
E che un dì ghe pà sento
ch'o posse raxonà
con meigo a ra farrà
senza soggetto
74
E in sciù ra fin de questo
o gh'ha depento un cuoè
con li appresso un figgioè
per guardian
75
Con un erchetto in man
e ra sò freccia dentro
c[']o mette bello spavento
à chi ro mira
76
E chi per liè sospira
puoè dì bon tempo addio
per che per liè è finio
ogni piaxei
77
Questa che ve fasso veì
a l'è un'ampoletta
pinna d'un segretto
da fà bella
78
A me fa stià a pelle
luxo com'un berrodo
vueo ciù quarche sodo
e puoeo miegio
79
Questo chi l'è o miè spiegio
o porto sempre in sen
per ammià se puoero ben
à o miè galante
80
Mi no ve posso dì quante
cose o m'ha deto
per un piaxeì che gh'ho feto
in tra cantinna
81
Questa ghoea a l'è finna
L'è o miè dinà da noxe
con sento atre cose
che non e mostro
82
Aura me remetto à o vostro
pareì s'ho raxon
andà in strambaon
pre sto galante
83
Mi n'havereiva tante
atre cose da dì
Ma no posso ciù stà chi
pre che ò quinta
84
Me toccheà pre zuinta
de tante mè paxioin
quarche rammà de ficchoin
in sciù ro morro
85
Vegnià pù un giorno
che sarrò spozà
finiò de tempestà
con quell'arpia
86
Ò sciù mi vaggo via
no me posso ciù fermà
bezuoegna che vagghe accattà
da fà da senna.