Ms. Marston 56/De lo testamento vegio e növo/Chì se contèm como Saramon regnà in Ierusalem e ave la gracia de la sapiencia da lo nostro segnor Dee
| ←Como Davit era re e fo elezuo pre lo pövo d'Issael, e como per amó de Bezabet o fe morí Uria | Manoscrito Marston 56, 1465: De lo testamento vegio e növo Como Saramon regnà in Ierusalem e ave la gracia de la sapiencia da lo nostro segnor Dee |
Como Saramon dè la sentencia de lo fantin de le doe femene peccarixe→ |
| tra parentexi quaddre e lettie da azonze, tra parentexi tonde quelle da esponze, lasciao a tirde in sciâ n, in corscivo i atre ligatue, in appexe i azonte posterioî, azonto maiuscole, pontezatua e diacrittichi segondo a prononçia zeneize do '700 (descrita da-o Prien), acento aguçço = vocale longa, acento grave = vocale curta, ö = œu, ë = æ, e’ = pronomme sogetto de I e III pers. scing. e pl., ‛o = pr. sog. II pers. pl. |
Chì se contèm como Saramon regnà in Egito Ierusalem e ave la gracia de la sapiencia da lo nostro Segnor Dee.
Regnà Saramon e pigià per mogié la figia de lo re de Egito, de la quá ello ave um figio avanti che ella avesse agni XI. E persò dixem li Zué che ella avea infantao contra natura. E Saramon lo fe norigá in la citë de Davi', inpersochè ello non ave faito caza, persochè o pensava de fane una caza in lo tenpio de Dee. E si pensava de fá murá Ierusalem de tre mure, soè che in lo promé murao fosse lo tenpio, e in l'atra parte fosse la caza reá e li söi officiari, e in lo segondo murao steisse li homi poderoxi e gentir, e in lo terso steisem li maistri de le arte. E pöa che Saramon ave menao so mogié, si se ne ze in Ebrom e fe grande offerte a lo nostro Segnor Dee, segondo che era costume, e si ge disse: "Demanda so che ti vöi, e si te lo darò".
Respoze Saramon: "E' sum grasom, e si ò pocho intendimento, per che e' te prego che ti me dagi seno e siencia, asochè e' possa reze e governá lo to pövo, e intennder bem e má".
Or, so che Saramon demandà piaxè monto a lo nostro Segnor Dee, e si ge disse: "Persochè tu non m'ai demandao richesa ni le anime de li töi inimixi, pinamenti e' te darò tanta richessa che non fo mai re chi n'avesse tanta, e averai vitoria sorva li töi inimixi, e anchora, sum la toa demanda, e' te darò siencia e seno in tá mainera che o non fo mai nisum re avanti ti ni depoí ti chi mai fosse ni sarà si savio, e se ti anderai per la via de to paire, che ti oservi li mé comandamenti como fe to paire, e' te stabilirò lo to regno per senpermai".
E dessàse lantó Saramon, e si se ne tornà in Ierusalem e offerì le soe offerte a lo nostro Segnor Dee.