Meistro Tacco 1788

by Meistro Tacco Çavattin

←vanni a-i atre vitoie

Pe ra vittoria riportâ da re galere zeneizi contro un grosso sciabecco algerin - Canzonetta de Meistro Tacco Çavattin

Zena, stampaja Cafarelli, Exemprâ conservao inta Biblioteca Universcitaia de Zena.
A traduçion in toscan do Zòrzo Tôzo l'atrovæ sciu www.academia.edu/41908914

Pe ra Vittoria Riportâ
DA RE GALERE ZENEIZI
CONTRO
UN GROSSO SCIABECCO
ALGERIN

CANZONETTA
De Meistro Tacco Çavattin.

Za che tutti in questa preiza
Fan sonetti, e fan canzoin
Vœuggio fâ mi asci ste rimme,
Che saran forsci e mæ primme
Perchè façço ou çavattin.

2
Ma ri monti staggan fermi,
E vorrendo tripudiâ,
Non ghe sâte pe ra testa
De postâse in quinta, o in sesta
Per poi mettise a balâ.

3
Ombra grande de Micrilbo, ^[1]
De prestâme in sta giornâ,
Mi te prego, o chittarin,
Con ro quæ ri Çittadin
Ti soleivi rallegrâ.

4
Ben è veo, che ne o compoñe
Ghe sarà disparitæ:
Netti son tutti i tò versci,
E ri mæ son mezi guersci
Tutti peççe, e desgœugnæ.

5
Saccie ognun, che o mæ mestè
O l'è solo tacconâ,
E che doppo mille stenti
Tiro i versci con ri denti,
Comme a pelle so stirâ.

6
Son Zeneize, e tanto basta,
E ne-o gaudio dra Çittæ
Vœuggio dî ri mæ stronelli,
Comme fan ri Darçenelli
Con chitáre descordæ.

6
Due Galee sciortan da-o pôrto,
Quasi appena retornæ,
E van leste comme o vento
Pe asbasciáne l'ardimento
De ri Barbari Corsæ.

7
Là vexin â Bordighera,
Ghe ven djto, che un Çorçâ
Ben provvisto de cannoin
E de gente, e muniçioin
O scorreiva pe ro mâ.

8
Alloa forçan veie e remme
Per trovâ sto bell'astou
E poi mettiro per peña
In galea a ra cadeña
Per trofeo dro sò valou.

9
Eivo là, che rò descrœuvan;
Presto, presto tutti in æra
Vœugan fôrte, a ciù non posso
Za ghe son con re ârme addosso
Remma, scía, aguanta affæra.

10
Ohime mi, che gran garbuggio!
Quanti sciœuppi, e quanto fœugo
Quanti spari de cañoin;
Sbraggi, crii, disperaçioin!
Ohime mi, che brutto zœugo!

11
Za ra morte in tutti i canti
Incomença a trionfâ:
Con picossi, e con manuelle
Fan sâtâ teste, e çervelle;
Che seiraña indiavolà.

12
Scôre o sangue come l'ægua
E dri Turchi, e dri Cristien;
Stan ri primmi sciù-a deffeisa,
Ri segondi attenti a-a preisa
Taggian teste, braççe, e mœn.

13
Crian ri Turchi: mia Maumetta.
Sbraggia pù, ti ò piggieræ:
E con dî viva Maria
Ghe fan fœura ra sciscia,
E ri lascian li aquæghæ.

14
Oh che prœuva de coraggio,
Oh che marca dei valou!
Eivo là o Scio Mattelin,
Con l'Alfiere Marçellin
Tutti fœugho, e tutti ardou,

15
Sâtâ addosso a ro Sciabecco,
Lesti ciù che i Paladin,
E ra spâ tegnindo in man
Fâ coraggio a ro Cristian,
E atterine l'Argerin.

16
E ri bravi Comandanti
Osservâ ben da per tutto,
Vigilâ, vedde, e provedde,
Fâ stâ quæto chi no credde,
Ch'o l'è çerto un cæto brutto,

17
Fin che sentan dîne evviva,
E che veddan ro Corçâ
Asbasciâne ra bandêra,
E vegnî dentro a Galera
Co-a canaggia lì a remâ.

18
L'è ben veo, che ro gambin
Sei di nostri n'an tirao,
Ma dri Turchi uña trenteña
A ro mondo an dæto a scheña,
E a Maometto an camminao.

19
Ra notiçia dra battaggia
L'è sgœura dentro a Çittæ;
Re Galee con ra so preisa
Caminando a ra desteisa
A ra vista so arrivæ.

20
Bello vedde re muragge
E re ponte de ri mœu
Griminie de garçoin
Fratti, Prei, grendi, piccin,
E de vêgi, e de figiœu.

21
Tutti pin de contenteçça
Fâne festa, ed allegria
Con sbraggiâ in âta voxe
Viva sempre a rossa Croxe,
Viva a Vergine Maria.

22
Per mirâ mi ascì ra preisa
Lascio o banco, con ra forma,
Caminando zù a ra mêgio,
Perchè sento, che son vêgio,
Giusto apponto a Piantaforma.

23
E de vedde tanta festa
M'è satao tosto in çervello
D'ojme mette a verseççâ
Ra vittoria per cantâ
Con ro son dro scigorello.

24
E i mæ versci contrafæti
Dari presto a ri garçoin
Per cantâri in âta vôxe
Sciù ro prao, e per a foxe
Mentre guiddan ri âsenin.

25
Saccian dunque i boin Zeneixi
E i me amixi besagnin,
Che applaudindo a ra vittoja
Vosse in versci fâ bardoja
Meistro Tacco, o Çavattin.

SONETTO.

Vegni, vegnì canaggia berettiña
A çimentâ de Zena ro coraggio;
Vegnì, che a ve darà ro bon viaggio
Con fâ de tutti voi tanta toniña.

Dragutte o n'insultava ra mariña,
Ma o ghe trovò ben presto ro marviaggio,
E mille, e mille che fen ro passaggio
Con Caronte dro Faro de Messiña.

Ressovegnive un pô d'œutt'anni fà,
E vederei che sempre eguale fin
Ra vostra Luña in Zena a l'averà.

E a perpetuo rossou dri Algerin
Ridî a Fama re glorie a saverà
De De Marchi, de Botto, e Clavarin.

1. Ro fu nostro Patriçio, e Poeta, ro Scio Steva Defranchi autou dro Chittarin Zeneize.