Lunaio Regiña 1893/Prefazion
| Lunaio zeneize compilao da-o sciô Regiña & C. pe l'anno 1893 de Prefaçion |
Revista→ |
| Zena, Stabilimento di Fræ Paghen |
Pe ûnn-a lunga tradizion
(Meno ûn cäxo straordinaio)
Chi componne a prefazion
Che a l'è in testa a sto lûnaio,
O mâtratta o maledisce
L'anno vëgio che o finisce
E o l'inneggia, co-a speranza
D'ûn ciû prospero avvegnî,
L'anno nêuvo, che in distanza
Za o se redde comparî.
2.
De manëa, che se se desse,
Cösa in pö diffiçilinn-a,
Qualchedûn che o possedesse
Tûtto quanto o Sciô Reginn-a,
D'a-o prim'anno pûblicôu,
Scinn-a a quello chi ë passôu,
O trovieiva, stando a-o fæto.
Constațôu në prefazioin,
Che scinn'aôa nö ghe stæto
Che anni grammi e mascarsoin!
3.
Eh! segûo che di malanni
Guære, debiti, cäsinn-a,
Se ne visto in te tant'anni
Che se stampa o Sciô Reginn-a,
E a-o poëta disgraziôu
No ghe forse mai toccôu
Che ghe muisse d'aççidente
In te atlantiche regioin
Qualche incognito parente
Da lasciaghe i so milioin!
4.
L'è asci vëo, che in sto marviaggio
Mëzo secolo passôu,
Chi ha vissûo do so travaggio
O l'ha sempre giamminôu,
E son pochi i fortunæ
Che fan sguasso de dinæ,
E o Governo prepotente
O n'ha mai vosciûo mollâ
O diritto ä povia gente
D'arvî e casce e comandâ!
5.
E l'è ûn fæeto, che i birbanti
Sempre birbi son restæ,
Benchè molti portan guanti
In omaggio ä Civiltæ,
Ne ghe[sic] stæto mai, chi desse
O dinâ senza interesse,
Ne se[sic] visto mai pëa stradda
I marenghi arriguelâ,
E n'ha dæto mai de babba[sic]
A so roba o büttegâ!
6.
Tûtto vëo, ma perdiesante
No besêugna esagerâ,
De miseie ghe ne tante
Da no poeile enûmerâ,
Ma ghe ascì, no me-o neghiei,
In compenso, di piaxeì,
Che sfrûtandoli secondo
A so propria condizion,
Pêuan fâ vedde questo mondo
Meno brûtto e mascarson!
7.
Ma per bacco, se in te l'anno
No ghe stæto carestie,
Guære fæte a nostro danno,
Desolanti epidemie,
De sommosse de strassoin,
Terremoti, innondazioin,
O ûn ciclon fenomenale
Da restaghe assolteræ
Ne-a sciacchæla generale
De miggiæa de disgraziæ,
8.
Se voi seì pin de salûte
E che eì co-æ de travaggiâ,
O n'eì proprio e stucche sciûte
Pe saveì dove disnâ,
E se seì tûtti in famiggia
Benestanti e forti in chiggia,
Perchè voì dentro ûn lûnaio
Versâ a vostra indignazion,
Pe non ëse milionaio
O Ministro da Nazion?
9.
Ognidûn le mäcontento,
Poscidenti e fradellin,
De sta vitta, ma a-o momento
Che se deve tiâ ö gambin
E lasciâ queste anscietæ,
Pe passâ all'Eternitæ,
Ghe pâ a tûtti troppo presto,
E vorrieìvan vive ancon
In t'ûn mondo comme questo
Coscì brûtto e mascarson!
10.
I lettoî do Sciô Reginn-a
Devan dunque perdonnâ,
Se sta votta, dä rotinn-a
Mi me vêuggio emançipâ,
E se invece de dâ adosso,
De fâ e corne a ciû no posso
Ad ûn anno memorando
Comme o l'è o novantedoi,
Questa votta, andiô cantando
E so, lödi ai mæ lettoi.
11.
Ve domando mi do resto,
Senza ninte esagerâ,
Se d'ûn anno come questo
Se porrieìva dine mâ?
O non ëa l'anniversaio
D'ûn evento straordinaio?
O quæ o l'ha, da çimma a fondo
Cangiôu tûtte e condizioin
Da politica do Mondo
E da vitta de Nazioin?
12.
E sto fæto memorando,
In te l'anno chi è passôu,
O n'è stæto, ve domando,
Degnamente celebrôu?
N'emmo visto e corazzæ
De Nazioin civilizæ,
Convegnî fraternamente
Tûtte in porto, a festezzâ,
Caxo nêuvo e sorprendente,
O Glorioso Çentenâ?
13.
N'emmo visto o Re e a Reginn-a
C'ûn corteo d'ambasciatoî
D'ûffiziali de marinn-a
De crachats de tûtti i coî,
Esine ospiti in te Sale
Do Palazzo Comunale
Pe onorâ co-a so presenza
O gran ballo da Çittæ,
Dove s'ean, pe l'occorrenza,
Trei palazzi avvixinæ?
14.
N'emmo visto e nostre stradde
Brûlicanti de foestê
Che in to porto, in scë caladde
E pë ciasse e i marciapê,
N'impedîvan quæxi o passo,
N'assordivan cö fracasso,
E se aveivan qualche lïa
Ammuggiâ in to borsellin
L'han lasciâ in ta trattorïa
O in te moen di vettûrin?
15.
E in mëzo a tanta gente
Con sto sciato indiavolôu,
O ciû lieve inconveniente
O no sè verificôu,
Semmo andæti de galoppa,
E cö vento sempre in poppa,
Che se deve in conseguenza
Se le andæto tûtto ben,
Ringraziane a Provvidenza
Che a n'aveiva in te so moen!
16.
L'é per lê che l'è riuscïa
Scinn-a a nostra Espoxizion
Che a l'ëa morta e seppellïa
Ancon primma da nascion,
L'è per lê che a quantitæ
Di balloin che s'en gonfiæ,
Aggiuttæ, portæ da-o vento
Che ö i spunciava a tûtt'andâ,
Son andæti a-o firmamento
Tûtti a reo, senza scc‑iuppâ!
17.
L'é per lê che ö tempo bello
O l'ha sempre seguitôu,
Scin che o sciato che o bordello
E i remesci han continuôu,
Che ghe stæto quello tale
Lavasson provvidenziale,
Da mandâ co-e gambe all'aia
Pe rispetto di foestê,
A famosa luminäia
Fæta in mëzo ai marciapê!
18.
Ma l'è ninte tûtto questo!
Voî seì ben che tûtta a stæ,
Da in çert'ospite molesto
Semmo stæti circondæ,
Che l'Europa quæsi[sic] intiera
A l'ëa marsa da-o cholera
E se a Zena o penetrava,
Le[sic] permisso domandâ,
Cose diascoa diventava,
O famoso Çentenâ!
19.
E l'è stæto veramente
Un miracolo do Çê
Se co-e feste e l'imponente
Affluenza de foestê
Con sto straggio de dinæ,
De begûdde e de disnæ,
S'emmo visto e stacche sciûte
E in sce-a porta de Pavian,
Ma fiorenti de salûte
Forti in gamba e o becco san!
20.
Ah lasciæme cai lettoi,
Da ottimista comme son
Proclamâ o novantedoi,
Comme ûn anno bell'e bon,
E fâ patto, che i ciû brûtti.
Comme questo seggian tûtti,
E a mi, sempre ciû stundaio,
Me se dagghe d'arrivâ
A illûstrali in to lûnaio
Scinn-a a l'âtro Çentenâ!
21.
Za se seì de gimichia,
Mi capiscio che vorriei
Fâme fa ûnn-a profezia
Pe illustrâ o norantetrei!
Ma quantunque ûn pö poëta,
Mi tantæ no son profëta
E nö parlo sempre a caxo
Pe o besêugno de parlâ,
Ma imitando S. Tommaxo,
Vêuggio vedde e controllâ.
22.
Se ve voei farsî de balle
E s'ei coæ da predizion,
Accattæve o Ciararalle
Compilôu da-o Sciô Bruzzon;
Con doî södi o dà o lûnaio
Co so terno a-o seminaio
E o ve notta e lûnn-e pinn-e
E i zazûin che s'ha da fâ;
E ö s'appende in te cuxinne
Pe saveise regolâ.
23.
Ho zà dito che o poëta
(Salvo minime eccezioin)
Quando o voieva[sic] fâ o profëta
In te queste prefazioin,
O tesceìva lodi apprêuvo
A-e virtù dell'anno nêuvo,
Pe mangiâ de repentïo
Quando questo o l'ëa passôu
E sbraggiâ cö stesso asbrîo
Che o l'ëa ûn anno aççidentôu,
24.
Mi fö invece differente
Perchè, cose serve a dî,
Troppo bello e promettente
Mi no veddo l'avvegnî
Anzi ö veddo troppo brûtto
Tutto neigro dapertûtto,
E, eccettuôu che, mancomale,
Sæmo tûtti vivi e sen,
Andiâ e cose in generale
A reversa e poco ben;
25.
Se dö in balle, tanto mëgio
Mi n'aviô de sûggession
A fâ e scûse all'anno vëgio
Per l'erronea predizion,
Coscì fosse, coscì voesse
O Segnô che me sbagliesse
E che fosse do mæ inganno
Per ûn Secolo obbligôu
A fâ e scûse ä fin dell'anno
E a sbraggiä: me son sbagliôu.