Lunaio Regiña 1892/Settembre
| ←Agosto | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Settembre |
Zena scûa e Zena ciæa→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Questo o l'é ûn bello meize
E o l'ha lê ascì e sò cöse...
Se pêu parlâ françeize
Se pêu fâ e lerfe imböse;
Magara poei zûgâ
A-o zêugo do compâ,
Comme ascì stando in letto
Se pêu zûgâ all'orbetto.
L'é stæta consegnâ
A-a Poliscia do nostro Municipio
Unn-a trezza copioza de cavelli,
Biondi, lûxenti e belli,
Nisciûnn-a ä và a rettiâ —
Unn'ätro o gh'a portôu l'ätra mattinn-a
A testa d'unn-a pippa camogginn-a.
Vista tanta onestæ,
Un ingleize o gh'ha dæto di dinæ —
All'indoman, pe arrûxentâ de motte,
L'Uffizio ä-a tûtto pin de pippe rotte.
S'ammïa in t'ûnn-a vedrinn-a
Duî canäi impaggiæ in sc'ûnn-a rammetta:
A femmina, meschinn-a,
A porze a-o masccio ûn pö de leitûghetta;
Lê o te ghe dà o baxin
E in eterno stan lì sempre vixin.
Ah! sci pe-a fedeltæ
No gh'é comme i öxelli imbalsamæ.