Lunaio Regiña 1892/Ottobre
| ←Zena scûa e Zena ciæa | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Ottobre |
A-o scûo de lûnn-a→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
« E SERENATE »
Se dà in questa stagiòn,
Che ghe o vin nêuvo bon....
Di saggi de stornelli popolari
Dösci a sentïse comme e rêue di cäri;
Questo l'ho sentïo vei:
Stornello-Serenata d'impropei:
Sciö de gragnêua,
Digghe ûn pô a quello zoėno ch'ho te parla
S'ho[sic] la[sic] do chêu ch'o vegne ûn pô de fêua;
Digghe, ch'o l'ha da ciärla,
S'ô va-a dï ch'ho m'ha dato e o m'a scrollôu,
E digghe c'ho me rende o mæ cappello;
Perchè ö vêu quello chi me l'ha prestôu,.
E o l'é un garzòn che gïa pé Pontexello.
2.
Sciö d'articiocca,
Digghe che de saluälo no me degno
Scibben ch'ho l'ha de l'aïa e ch'o se stocca;
Ch'ho mette a testa a segno,
Che gh'ho o no-me-toccä, gh'ho tanto addosso
Che squæxi manco ciû mesciä me posso.
3.
Sciö streppellä,
Mïa che se l'ätra nêutte son scappôu
L'é stæto pë no fâte ressatä;
M'ao-a son chi ciantôu,
Bell'ostrega d'arsilio in t'ö limon,
E pë ti vaddo a mûggio, e in strambællon;
Tremmo, bägio, sospïo, me luxe i êuggi,
Pän sospïi da prexoin, centi da trêuggi.
4.
Masso dë preboggión,
Son chi tanto araggiôu che metto puïa,
Ma voi a mosträ-a patente ne sei bon;
Mannin, mandilo via,
Ch'a sä-a pe tûtti quanti ûnn-a fortûnn-a,
Perchè vêuggio ammassälo a-o cæo da lûnn-a.
« Andando via »
Pe däghela in ta pansa
Gh'orieiva ûnn-a messoïa....
Sö scappa, e o nö s'avansa,
Tanto o le pin de poïa!