Lunaio Regiña 1892/Novembre
| ←A-o scûo de lûnn-a | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Novembre |
Dexembre→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
« I Morti ».
Pövei morti! sotto ä prïa
Dell'ipocrita leggenda
Che-e passâ sotto ä trafïa
Dell'intrigo e da faccenda;
Dell'erede chi ha trovôu
E virtù che n'ei avûo,
O gran ben che v'han vosciûo
Tûtto insemme agglomerôu,
In ta pansa ä cascia-forte
L'indoman da vostra morte,
Pövei morti! queste scioî
Che piaxeivan tanto a Voi,
Quando o chêu o ve dava i lampi
Pin de vitta e de pascion,
Permettei che in questi campi
Ve-i semenn-e a profûxion.
Mi no sò ninte de çerto,
Chi seggei n'ho da çercâ;
Solo sò che aviei sofferto
Pe-o destin ch'emmo d'amâ;
Che aviei cento chissà quanto,
Tanto, tanto; tanto, tanto!
L'é per quello che anche mi
Scrollo e lagrime a ste scioi;
Quando e scioi di êuggi cäi
Aivan lagrime anche lô,
Ve-o scordävi forse mäi
O profûmmo d'ûnn-a sciô?
Sciö gentile, fresca, viva,
Ch'a v'ammiäva, ch'a languiva?
Pövei morti! — L'ho sorpreiza
Quella pallida sciammetta
In sce-a neigra äia sospeiza
Baxâ ûn costo de viovetta,
Poi tornâ in ta seportûa
Ciù slavâ ch'a n'ëa vegnûa;
Pövei morti! ei da pensâ!....
Dormî in päxe, fæ a nanâ.