Lunaio Regiña 1892/Mazzo
| ←Arvî | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Mazzo |
Zugno→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Daniele Morchio.
Semmo a Mazzo tûtto scioî,
Tûtto blêu, tûtto armonïa ;
Tûtto frasche pe-i pittoî,
Pë scignöe tûtto allegrïa;
Pe-i poëti e-i azenetti
Pin de bòtti, e de sonetti.
Mi no sò; ma questo meize
O me f..... dïto e stæto.
No ghe n'é ätro in scëo zeneize,
No sò cöse gh'aggie fæto;
O me dâ ûnn-a patta a-o chêu
E-o me doggia comm’o vêu.
Veddo lonxi ûnn-a torretta,
Un giardin, veddo ûnn-a crêuza;
Veddo di êuggi de viovetta,
Sento ûn alito de rêuza,
E ûn tremmô tra carne e pelle
Che o me fà brûxâ e parpelle.
Oh! se almeno solo ûn crïo
Da sò vöxe o me portesse;
E, cö vento, o sghêuo fallïo
Do sò pê sentì o me fesse,
Vedde solo l'ombra sò
Là, trammëzo a-o steccadò!.....
E onde l'ægua in t'ûn abbisso
Và de rocche a rammadàn,
Do mandillo veddo o pisso
In to giglio da sò man,
Comme ûn'ä-a chi dixe addio.
A svanisce e l'é finio.
L'é bello s'addormî
In t'ûn mûggio de scioî,
E quando e tûtto fæto
Addesciase pè ammià cose ghe stæto.