Lunaio Regiña 1892/Marso
| ←Frevâ | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Marso |
Arvî→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
« Pe-a colonia Eritrea »
Doppo che s'é scoverto
Che l'accûsâ in scë primme,
I birbi.... do deserto
L'han dicciarôu sopprimme,
Me pä, zà che l'idea
A l'é de voei stä là,
Che ghe saiæ manëa
De fälo comme và.
« E corassæ ë torpedini
Descommodà no vêuggio;
Che, tanto pe servïsene,
Ne pêuan costäne ûn êuggio;
Poi no vorriæ fâ guæra,
Pëzo che pestâ in mâ,
Con di mainæ de tæra
Comme se vêu in giornâ.
Manco tocchiæ l'esercito,
E, pe tiâ l'agua a-o moin,
Me parriæ ben tornäsene
De nêuvo a-o pei martin.
Mi dæ l'impreiza a scarso,
Proprio chì, ne-a Rivëa,
E, giûsto de sto Marso,
Battieiva l'assemblëa;
Pe no fâ i passi doggi
Andiæ pe scarmi a-o Mêu,
Fæ ûn säto, e in sce Camoggi
Piggiæ finn-a i figgiêu;
Andiæ in sce Quarto e Söi
E li faiæ man bassa;
Pe Borzonasca poi
Tûtta ûnn-a leva in massa.
Senz'ätro contingente
Fêua che de questi sciolli,
Andieiva a Prè pe gente,
E ä Chêuscia pe minolli.
Missa sta röba insemme,
Atro no é ciù da fâ
Che tiâ zù due giastemme
E dî dove han d'andâ.
Tûtto l'é bon! — De ciatte,
De barche descûxïe,
Pe scarpe, de savatte;
Pe remmi, de spassoïe.
Solo, coscì pe scëna,
Poeì fäghe ricordâ
Che pe l'antiga Zëna
L'äa ûnn-a conchetta o mâ.
Ebben? Senz'ätre balle
Vei chì tornæ. Che festa!
Han a zimmara a-e spalle,
Han o tûrbante in testa,
A scimmitära in man,
Son neigri comme a pesta
E parlan l'egizian.
Ve mostran Cantibai
Co-e figgie e co-i messiai,
Re Zäne e Menelicche,
Tûtta ûnn-a procescion,
Debeb co-a sciarpa rossa,
Ve portan chì o sciô Mossa
Ligôu comme ûn straççon.
E a pelle ghe scommetto
Che quelli ch'en restæ,
Ne sän ciù che Maometto
E han coffe de dinæ.
De Marso o vento o vïra
E pä che boggie a bïra.
Avieì zà misso e räve
Comme de ätre votte;
Ammiæ de no scordäve
De semmenâ e carotte.