Lunaio Regiña 1892/Luggio
| ←Zugno | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Luggio |
Agosto→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Paolo Boselli
O cädo o schizza forte - pe-o sô chi l'intra in lion
E d'axillâ in scë spiäge - commensa a tentasion.
Ghé pin de manifesti - d'ogni stabilimento
Se dan tûtti d'attorno - quelli do Salvamento.
Comme é sciatôu e scignöe - a n'é cösa da credde,
Che san comme l'é igienico - quello de fäse vedde.
Chi preferisce Sestri - chi Nervi, chi Rensen,
Chi Sampedænn-a e i mäi - i mäi a Corniggen.
In questo meize scazzan - de brûtte profesïe;
No son colpi de fûlmine - manco no son moutïe;
Ma con raxon in parte - s'allarman i bagnanti,
Perchè, no se sà comme - st'anno ne nëga tanti.
Ch'a segge l'affluensa - de tûtto o gran mondisio?
Ch'a segge ûn'influensa? - co segge ûn malefisio?
Ma intanto pe-i disastri - che porta l'ægua sâ
O Salvamento o pensa - s'o pêu seccane... o mâ.
E, con stûddiäghe addosso - visto che fa mâ o bagno,
O presentiâ o progetto - de prosciûgâ o Bezagno.
Coscì s'aviæ do spazio - e poco saiva o costo,
Da fâghe de baracche - pe mette a gente a sosto.
Amenochè... quell'atre - seggian zà destinæ.....
Lì ghe ne stæ di letti! - ciù che in te quattro ûspiæ!.
Se scrêuve un banco d'ostreghe
In mëzo ä gran peschëa
Da passeggiäta pûbblica,
E primma no ghe n'ëa!
A societæ Colombo
A fà ûnn-a relazion
Ch'à dîxe in conclûxon:
Che sò l'é tutto o merito,
Perchè ûnn-a votta, forse,
A g'ha lasciôu de scorse
Ch'aveivan a semensa.
E se dà ûn vöto ûnanime
De lôde a prescidensa.