Lunaio Regiña 1892/Frevâ
| ←Zenâ | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Frevâ |
Marso→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
A Zena ö in ätro scïto
Dixe che é morto ûn strûsso.
Ma l'han averto fïto
C'ûn longo cottellûsso:
E gh'an trovou ne-o stêummago
Quattro elmi da pompê,
D'ûn assessore o spirito
E-a göa d'un conseggê;
Duî tocchi de bottiggia,
Un'ærbo de famiggia,
L'äia de ûn prescidente,
Dell'ægua do Corzente;
A revista dell'opera
Nêuva che fà o Franchetti,
Dozze marscinn-e reddene
Zȧ pronte pe-i frexetti;
Çento discorsi a-i popoli,
Un tordo de passaggio,
E drento a ûn'ode barbara
Ascözo ûn spïgo d'aggio.
I dotti, do fenomeno
Vegnindo a cognizion,
E voendo ûnn-a scientifica
E ciæa definizion,
Pe-a puïa de pai balordi
E fäse coggionâ . . . . . .
Han sentensiôu: che i tordi,
Con l'aggio, pêuan fâ mâ.
Grande accompagnamento
Do Carlevâ de Zëna,
Fæto co-e pompe a vento
E-o cäro di trasporti
Ch'o l'assottæra i morti.
Dixe che o freido o dûa
Ma che nisciûn o cûa.