Lunaio Regiña 1892/Dexembre
| ←Novembre | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Dexembre |
Pe-o ritræto de Ninì→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Trionfo da Ginnastica.
Ghe sä ûnn-a premiazion
Ne a quæ i figgiêu han da mettise
Tûtti sciû ne-o loggion.
Dovian, pe piggiâ o premio
Slansase da-o pollä,
E cazze in palcoscenico
In t'ûn säto mortä.
L'effetto sorprendente
O fä corrï da gente.
Se vêu che ûn mego celebre
O tegne pë veitæ
Che a vitta a pêu, aslongandose
Dûâ ciû che primma assæ.
E dixe ch'o gh'ha o reçipe,
In base a trasfoxion
Do sangue, e o vêų deduendone
Quindi a so concluxion,
Che spesso se fasse: ûso
D'ûn sangue molto forte
(Ma o deplora l'abûso
De usâ de bestie morte).
E-o credde che servindose,
De quello d'ûn leon,
Se fæ vegnî ûn anemico
Mëgio d'ûn ommo bon.
Per cui ao-à, trattandose
D'allungâ l'existenza,
Ghe da çercâ ûnn-a bestia
Ch'aggie ciû rexistenza.
E con questa teorica,
Chi no ghe cazze fallo,
O primmo di quadrupedi
O saiva o pappagallo.
De lë, salvo i malanni,
Sempre ho sentïo contâ;
Ch'o pëu scampä çent'anni,
E co se pêu provä.
Se scrêuve unna miniera de carbon
De sotto a-e fondazioin da Prefettûa;
E ghe tûtto ûn filon,
Che no se pêu savei pe quanto o dûa.
Se sciätan tûtti, in zù;
Per avei l'esercizio da minëa:
Ma ghe vorriæ a manea
De trasportâ o palazzo ûn pô ciû in là;
Questo l'han domandôu: ma no se sà
Côse se rispondiâ.
E, se o Governo o bollo o ghe mettiâ.
Benchè fioriscan[sic] za tanti brignoin,
Ghe de costipazioin.