Lunaio Regiña 1892/Arvî
| ←Marso | Lunaio zeneize compilao da-o sciô Regiña & C. pe l'anno 1892 de Rivista profetica do' 92 - Arvî |
Mazzo→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Gustavo Paroletti.
O pescio d'ësto meize
O l'é mëzo zeneize
E mëzo americàn,
O sä piggiôu co-e nasse
Lazzù da-e Fronti basse.....,
Ch'o segge ûn pescio can?
S'annunsia pe-i giornali
De tûtti i sette coî,
Paolotti e liberali,
Che i combi viaggiatoî
Dev'ësan sûpplantæ
Da ûn'ätra novitæ.
Che a saiva ûnn-a manëa
De posta ciù segretta,
Cösa ch’a no pä vëa!
E chi faiâ a staffetta,
Miæ che no parlo a braççe,
Saieivan de lûmasse.
A lûmassa scimpatica,
Quella dä scorsa grïxa,
Dïta dä scienza Coclëa,
E a lascia poca frïxa;
(De chì l'é vegnûo: Coclite,
Pe dî quelle eteroclite).
Queste in tempo de guæra
Han fæto bonn-e prêuve;
Se veddan poco in tæra,
No temman quando ciêuve;
Intran inosservæ
Pe-i bêuggi e pë ferræ.
Miæ che no gh'é da rïe
E-a sciensa a l'é ûnn-a cösa
Da no sciaccäse e die
Quand'a l'ha a lùnn-a imbösa!
Guiddâ dä sûggestion,
Zûgghæghe ûnn-a fûgaçça
Che ha da vegnî a lûmassa
Unn-a rivelazion!
Ma sento sbraggiâ: nëia!
Lëzo në predisioîn di mæ profëti
Che vegniâ de ätre modde; ma o ciù bello
Vittin pe ûnn-a scignöa sä sempre quello